Carriola.Cons. do Mar 14.09.26
julio@carriola.es
O Centro de Formación A Aixola, dependente da Consellería do Mar e xestionado polo Centro Tecnolóxico do Mar-Fundación CETMAR, pon en marcha un novo ciclo de cursos que se desenvolverán ata o vindeiro mes de decembro nas instalacións cedidas pola Autoridade Portuaria de Marín.
Trátase de seis actividades formativas cun eminente carácter práctico, seguindo o principio de «aprender facendo», e para as que non se requiren cualificacións mínimas. A formación, financiada pola Consellería do Mar e polos fondos FEMPA (Fondos Europeos de Pesca Marítima e Acuicultura), é totalmente gratuíta.
Os cursos están dirixidos a persoas desempregadas ou vinculadas ao sector pesqueiro que desexen reorientar o seu perfil profesional ou garantir o relevo xeracional nun oficio altamente especializado e en risco de desaparición, pero con demanda nas confrarías e nas empresas do sector marítimo-pesqueiro.
Oferta para o derradeiro trimestre do 26
A oferta para este trimestre inclúe un curso de operacións auxiliares de acondicionamento interior de embarcacións (tapicería e madeira) de 350 horas, no que se empregarán técnicas tradicionais e innovadoras, e outro de
operacións auxiliares de arboradura (mastros e velas) de 200 horas, destinado ao coñecemento e a práctica en montar e desmontar diversos compoñentes da arboradura náutica, o seu mantemento así como operacións básicas de reparación de velas.
A nova programación de A Aixola contempla ademais a Introdución a unha das técnicas máis novidosas para a creación de pezas en poliéster no curso de operacións básicas de infusión e baleiro en composites, de 300 horas orientado ao sector náutico e á acuicultura, e outro sobre procesos básicos de plásticos técnicos aplicados ao sector mariño (200 horas).
Outras formacións
As formacións sobre actividades auxiliares en diagnose e posta a punto de fora borda menores de 30 CV (220 horas) e a introdución á carpintería náutica con control numérico (CNC) (70 horas) completan a oferta para os próximos tres meses.
Inscrición con prazas limitadas
As prazas son limitadas e a inscrición xa é posible a través da páxina web do centro (aixola.cetmar.org) ou contactando vía correo electrónico (aixola@cetmar.org) ou telefónica (886 206915).
Na actualidade, A Aixola é o único centro acreditado que imparte esta formación.
