Carriola. Deputación Pontevedra. 12.10.25
A Deputación de Pontevedra acaba de completar a liña de emprego do Plan +Provincia, con preto de 8,2 millóns de euros para que 36 concellos da provincia contraten a 659 persoas en situación de desemprego. “O +Provincia –asegurou Luis López- é unha ferramenta de tremenda utilidade para os concellos. Non soamente achega recursos para investimentos e gasto corrente, senón que os dota de algo tan imprescindible como son 659 persoas traballadoras, fundamentais para garantir a atención da cidadanía nas mellores condicións e unha correcta prestación dos servizos públicos”.
Con estes recursos, os municipios puideron contratar este ano a entre 3 (Dozón) e 33 persoas (Vilagarcía de Arousa) para desempeñar tarefas esenciais como persoal de Administración (técnicos, auxiliares, administrativos e ordenanzas); para o Servizo de Axuda no Fogar e traballo social; para o servizo de socorrismo; persoal técnico en turismo, guías de turismo e animación sociocultural; enxeñeiros e técnicos en medio ambiente, operarios de saneamento e recollida de residuos; traballadores para o mantemento de obras públicas, para a limpeza e parques e xardíns; bibliotecarios e técnicos e auxiliares de cultura e para museos.
