Carriola.Redacción. 05.03.25
Máis de 30 persoas asistiron ás primeiras sesións en Marín, Poio e Sanxenxo, e a programación continúa nos próximos días en Bueu, Meaño, Pontevedra e Marín
O “GALP Ría de Pontevedra” continúa coa presentación da súa nova convocatoria de axudas para 2025, destinada a impulsar proxectos que favorezan o desenvolvemento sostible da ría e os seus municipios. Tras a celebración das primeiras xornadas informativas, máis de 30 persoas participaron xa nos encontros organizados en Marín, Poio e Sanxenxo.
Segunda rolda de encontros
Agora, a seguinte rolda de encontros desenvolverase nos municipios de Bueu, Meaño, Pontevedra e Marín ao longo desta semana. O mércores, as sesións terán lugar en Bueu, no Centro Social do Mar ás 11:00 horas, e en Meaño, na Casa da Cultura ás 17:30 horas. En Pontevedra, en colaboración con ABANCA - Mar, a xornada será na Sede Afundación o xoves ás 17:00 horas. E por último, en Marín, e da man da Autoridade Portuaria, celebrarase a derradeira sesión no Auditorio do Edificio de Operacións Portuarias o venres ás 11:00 horas, cun enfoque especial para as empresas do porto.
Información e asesoramento
Estas sesións informativas teñen como obxectivo achegar ao tecido empresarial, asociacións, entidades do sector pesqueiro e público en xeral as bases da convocatoria (ORDE do 12 de febreiro de 2025), resolver dúbidas e ofrecer asesoramento para a presentación de proxectos.
Inscripción previa dos interesados
As persoas interesadas en asistir a estas sesións gratuítas deberán inscribirse previamente. Para máis información, poden contactar co GALP no teléfono 886 213 015 ou no correo electrónico gacpontevedra@gmail.com. O GALP Ría de Pontevedra xestiona máis de 1,5 millóns de euros para esta convocatoria de axudas no marco do Fondo Europeo Marítimo, de Pesca e de Acuicultura (FEMPA) 2021-2027 e ao abeiro da Estratexia de Desenvolvemento Local Participativo (EDLP). O prazo para presentar as solicitudes está aberto ata o 21 de marzo.
