Carriola.Redacción. 11.05.25
O colectivo Marín de Cine – Club Audiovisual, promovido polo comunicador local Dani Antelo, vén de lanzar unha campaña de crowdfunding para financiar a organización da 4ª edición do MAC MARÍN – Mostra do Audiovisual e Cinema de Marín, que inclúe os Premios John Balan.
Esta iniciativa, que xa está activa e se pode seguir a través da ligazón
https://www.verkami.com/projects/40962-sementa-cinema-recolle-emocions-colabora-co-mac-marin
busca complementar os apoios institucionais e garantir un evento de calidade, tanto para os profesionais e artistas convidados, como para o público asistente.
A Mostra, que se celebrará do 20 ao 23 de agosto, forma parte da programación cultural de verán do Concello de Marín, e constitúe un espazo de encontro anual co audiovisual, con especial atención ao Novo Cinema Galego.
No Circuito Internacional de Festivais
Este 2025, e tras obter a credencial oficial da Web Series World Cup (WSWC), o MAC MARÍN xa está a formar parte do circuíto internacional de festivais que puntúan no ránking mundial de webseries, o que supón un importante recoñecemento ao traballo realizado na última edición pola organización.
Contido do festival
O programa incluirá proxeccións dos tres formatos en competición —webseries, curtas e longametraxes—, charlas con profesionais do audiovisual galego, e obradoiros dirixidos á mocidade e á infancia. Este ano, xa está confirmada a participación de Nuska Chousa, que compartirá os seus coñecementos sobre o coidado da horta co público. Tampouco faltará o humor e o recordo a John Balan: nesta edición innovaremos cunha performance tipo clown, ofrecendo unha experiencia distinta aos monólogos dos anos anteriores.
As produtoras interesadas en participar no certame poden consultar as bases e inscribirse a través da web oficial:
www.mac-marin.com
e, Marín de Cine – Club Audiovisual anima á veciñanza a apoiar esta campaña de crowdfunding e a facer parte deste proxecto cultural que segue a medrar co apoio de todas e todos.
